Տրանսպորտի և կապի նախարարություն

ՀՀ տրանսպորտի, կապի և տեղեկատվական տեխնոլոգիաների նախարարությունում գործող «թեժ գծի» և տեղեկատու հեռախոսահամարներով 2019թ. հունվար ամսին ստացվել է 221 հեռախոսազանգ:

Նախարարության «թեժ գծին» զանգահարած քաղաքացին տեղեկացրել է, որ Փարպի-Բազմաղբյուր-Ղազարավան թիվ 513 երթուղին որոշ օրերի սպասարկվել է անկանոն: Ահազանգը համապատասխան գրությամբ ներկայացվել է տեսչական մարմնին՝ վերահսկողական գործառույթներ իրականացնելու նպատակով: 

Երթուղին սպասարկող ընկերությունը տեսչական մարմնի կողմից զգուշացվել է փոխադրումներում խախտումները բացառելու վերաբերյալ:

Մեկ այլ քաղաքացու բողոքն էլ վերաբերում էր Թալինի ճանապարհահատվածում առկա մերկասառույցին, որի պատճառով իր վարած մեքենայով վթարի է ենթարկվել: Տեղում անցկացված ստուգմամբ պարզվել է, որ ճանապարհի սառցակալման պատճառը «Վեոլիա Ջուր» ՓԲԸ կողմից սպասարկվող խմելու ջրի խողովակի վթարն է: Վթարի հետևանքները վերացվել են նույն կազմակերպության կողմից:

ՀՀ տրանսպորտի, կապի և տեղեկատվական տեխնոլոգիաների նախարարությունը հորդորում է վարորդներին երթևեկել ձմեռային անվադողերով և պահպանել ավտոճանապարհներին սահմանված արագությունը: 

Նույն ժամանակահատվածում «Հայաստանի ավտոմոբիլային ճանապարհների տնօրինություն» ՊՈԱԿ-ի տեղեկատու հեռախոսահամարով 219 քաղաքացիներ օպերատիվ տեղեկատվություն են ստացել ՀՀ միջպետական և հանրապետական նշանակության ավտոճանապարհների վիճակի վերաբերյալ:

ՀՀ տրանսպորտի, կապի և տեղեկատվական տեխնոլոգիաների նախարարությունը տեղեկացնում է, որ հանրապետության ավտոճանապարհների վիճակի վերաբերյալ ամբողջական և օպերատիվ տեղեկատվություն քաղաքացիները կարող են ստանալ ինչպես նախարարության պաշտոնական կայքից (www.mtcit.am), այնպես էլ նախարարությունում գործող (010) 56-25-33 տեղեկատու հեռախոսահամարով:

ՀՀ տրանսպորտի, կապի և տեղեկատվական

տեխնոլոգիաների նախարարության

լրատվական ծառայություն